zérbaz

Travay si zérbaz la Rénion

Nout sékans té i port si lo band diféran zérbaz la Rénion , épisa si lo maniér transmét ; pou oir si zordi ankor bann zén konm nou minm i koné (ankor)  kosa i lé : Kanel , Sitronel , Féy kafé , kré d’pés, komomi, tronplamor …. Sirtou kosa i fé ansanm ! Mon bann dalon sanm moin mém nou la rét bét kan nou lavi lo kantité zérbaz néna, lo kantité konésans nout bann gramoun néna, lo kantité la zarlor nou pérd ! ! !

Anou zén rénioné nou koné rienk in séri zérbaz limité ! Sét nou anserv lo pli souvan, sét pou nou lé normal akoz gramoun sanm momon i done pou boir (anfin i obliz). Konm lo pli souvan marmay isi i gingn la grip, nout bann gramoun i fé tizane, in grog.  Andan i mét

==> Kanel : i anserv ali pou dékaz la gorz. I pran dé, troi fey pou mét andan akoz son gou lé asé for .

==> La po zoranz sansa mandarine : ali sé pou done lo kou, épisa la koulér lo tizane

==> Sitronél : i itiliz ali pou kan lo gorz i fé mal. ou pran dé, troi fey pou mét andann. li na in pé lo mém fonksion lo kanél.

Episa néna osi band tizane pou rafrési, pou éd lo kor travay konm i fo:

==> Fey kafé : i anserv pou lésofman, kan domoun i gingn pa alé pisé lo fey kafé i éd. ou pran dé, troi fey épisa ou fé bouy.

==> Barb mai sansa lo mai : ou itiliz ali osi pou lo mém zafér lo fey kaf. Kan ou fé bouy out mai, lo lo ou ramas, ou lés rofroidi épisa ou boir. pou lo barb mai ou fé bouy ali épisa ou boir. na dé, troi moune i mét in pinsé do sél andan.

==> Grine dé lin : li rosanm lanti. Ou mét ali pou bouy épisa ou boir ali.

….

Ala dé troi tizane pou rafrési lo kor, pou armét droit si la rout. Soman néna ankor in tralé tizane anou band zén nou koné pa. Néna plisir rézon, plisir solision pou band marmay grandi san la konésans, sans la tradision, la kiltir lontan. Soman lé maléré akoz la transmision i mars pa :

– akoz lo band paran i vé po transmét ( souvandéfoi sé in doulér pou zot romont souvnir lontan )

– akoz lo band gramoun la po fé lo transmision zot marmay sansa zot i zanfan mém

– akoz band zén koméla i rod pi, i sérs pa ousa tousala i sort

– akoz lo band tizane mém néna pi, i trouv pi si la rout

Tousala i perd sanm lo tan , sanm lo bann gramoun…. Nout sosiété koméla i fé pi tro in pla épisa marmail i grandi i koné rienk tizane si fey papié ! Sé pou sa nou la soisi  L.C.R. Li  aport anou in tralé zarlor , in tralé konésans kisoi si nou mém kisoi si la kiltir kisoi si lo fason manzé ….. Kréol nout toute, alon mét ali anlér pou gingn fé lo transmision sanm la zénés ! !  !  ( suit domin )

Laisser un commentaire

Vous devez être connecté pour publier un commentaire.